மனசு முழுக்க காதல்.

காதல் வந்திரிச்சி
எனக்கு காதல் வந்திருச்சி
ஊர் சுற்றி திரிந்த
எனக்கு ........
உருப்படி இல்லாத
எனக்கு...
யார் கண்பட்டதோ..
காதல் வந்திருச்சி

நிலவை நான்
ரசிக்கவில்லை..
நீல வானம்
விருப்பமில்லை..
கோல மயிலின் இறகை
என்றும்..புத்தகத்தினுள்
வைக்கவில்லை
காதல் என்ற பெயரில்
எங்கும் நான்...
கால் கடுக்க அலைந்ததில்லை.
இருந்தும்..
காதல் வந்திரிச்சி
எனக்கு காதல் வந்திருச்சி

யாருவிட்ட சாபமோ..
எனக்குள் காதல்
வேருவிட்டு போச்சி

நீல வானம்
அதில் நீந்து மேகம்
காதல் சுமந்த காற்று
காலைநேர பனித்துளி
இலையருகே பூக்கள்
இத்தியாதி...இத்தியாதி....

எல்லாம் ரசிக்கிறேன்
இப்போது எல்லாம் ரசிக்கின்றேன்

ஓடும் நதியிலே
என் காதல் நீந்துது
ஓலமிடும் கடலிலும்
என்காதல் வாழுது..
காரணம் ...
காதல் வந்திரிச்சி
எனக்கு காதல் வந்திருச்சி

நாச்சியாதீவு பர்வீன், இலங்கை.

Read more...

நதியின் பாடல்.

நதியின் பாடல்
ஒரு மெல்லிய ராகமாய்
ஒலிக்கும்..
இடைவிடாக் கனவுகளில்
இடறி விலும் வாழ்க்கை
நாறிய நிமிசங்களைப் பார்த்து
காறித்துப்பும் நினைவுகள்
அடைகாத்த அருவெறுப்புக்களை
அசைபோட்டு அழும் மனசு
தீப் பிடித்து எரியும்
காலத்தின் முதுகில்
இரண்டு வெண்ணிறக் கோடுகள்
ஒன்று பிறப்பாய்
மற்றையது இறப்பாய்
எல்லா சோகங்களையும்
சுமந்து கொண்டு
மவுனப் பாடல்களை
இயற்கை இசைக்கிறது..
எஞ்சியிருப்பது
நதியின் பாடல் மட்டுமே..
அதுவும் விதி மாறும் வரைக்கும்தான்.

நச்சியாதீவு பர்வீன்
இலங்கை.

Read more...

காத்திருப்பு...

வாழ்க்கையில் பல சந்தர்ப்பங்களில் நாம் காத்திருக்க வேண்டியுள்ளது,காத்திருத்தல் ஒரு அவஸ்தையான அனுபவம், காத்திருத்தலில் சுகம் இருக்கிறதென்று சிலர் சொல்லக் கேள்விப்பட்டுள்ளேன், என்னளவில் காத்திருத்தல்
மிகுந்த அவஸ்தைக் குறிய விடயமாகும். அப்பப்பாஎவ்வளவுதான் காத்திருப்பது மனிதன் பிறந்ததிலிருந்து காத்திருத்தல் ஆரம்பமாகின்றது, எனக்கென்றால் அதிகமாக காத்திருக்க நேர்ந்தது பஸ் தரிப்பிடத்தில் தான், நான்பாடசாலை செல்ல ஆரம்பித்ததில்
இருந்து வேலைக்கு செல்லும் இன்று மட்டுக்கும் பஸ்சுக்காக
காத்திருந்து அவஸ்தை பட்ட, படும் நிமிடங்களை சொல்லி மாளாது, நான் எப்போதும் காதலிக்காகவோ, நண்பர்களுக்காகவோ காத்திருந்து அவஸ்தைபட்டது கிடையாது ஆனால் மணிக்கணக்காய் பஸ் தரிப்பிடத்தில்
கால் கடுக்க நின்று என் தலை விதியை பல தடவை
நொந்து கொண்டுள்ளேன், யாருக்காவது காத்திருத்தல் பற்றிய
சுவையான அனுபவம் இருந்தால் சொல்லுங்களேன்.

Read more...

மழை,மழை, மழை...

இன்றைய பத்திரிகைகளின் தலைப்புச் செய்தி மழை யாகும்
கடுமையான மழையினால் மேல்மாகாணம், மலையகம்
என்பன பெரிதும் பாதிக்கப் பட்டுள்ளது, அதிலும் மேல்மாகாணத்தில் கொழும்பு, கம்பஹா போன்ற மாவட்டங்கள் வெள்ளக் காடாக மாறிப்போயிருந்தது
இந்த நிலைமையில் பாதிக்கப் பட்ட மக்களுக்கு அனர்த்த முகாமைத்துவ அமைச்சின் உதவிகள் கிடைத்த போதும்
அது போதுமான தாக இல்லை என்பது தான் உண்மை.

கம்பஹா மாவட்டத்தின் பல பிரதேசங்களில் மக்கள் வீடுவாசல்களை துறந்து, போக்கிடம் இல்லாமல் தவிக்கின்ற
நிலைமை உருவாகி உள்ளது, இந்த நிலையில் பாதிக்கப் பட்ட மக்கள் உடல்,உள ரீதியாக பாதிக்கப் பட்டுள்ளதோடு, அவர்களின் அடுத்த கட்ட நகர்வுகள் பற்றிய எந்த வித முனைப்புகளும் இல்லாமல் இருக்கின்ற அவலம் இன்னும்
தொடர்ந்து கொண்டுதான் இருக்கின்றது,

தொடர்ந்தும் மழை பெய்யலாம் என்ற வானிலை ஆராய்ச்சி
நிலையத்தின் ஆருடம் இடம்பெயர்ந்தவர்களின் மீள் குடியேற்றத்தில் தாமதத்தை உண்டு பண்ணலாம்...

அரசாங்கத்தின் கையில்தான் .........இனி இவர்களின் வாழ்வு..

Read more...

தூக்கம் ...

உடைத்தால்
கட்டமுடியாத கூடு
படுக்கையிலே
ஒளிந்திருக்கும்..
தனி உலகம்
கனவின் கருப்பை
இருட்டுக்குள் தெரியும்
வெளிச்சம்..

துக்கம் மறைய

தூக்கம் அவசியம்..

Read more...

"அங்காடித்தெரு" அழகான கவிதை.

தமிழ் சினிமாவின் மிகக்கேவலமான அடையாளங்களையும் தாண்டி அவ்வப்போது சில நல்ல திரைப்படங்கள் வெளிவருவது கொஞ்சம் ஆறுதல் அளிக்கின்றது
காமக் கூத்தின் கடிவாளமாகி, சினிமாவின் தரம் மிகக் கொச்சையாகி விட்ட
இந்தக் காலங்களில் வெளிவந்திருக்கும் ஒரு அற்புதமான சித்திரம் தான் "அங்காடித்தெரு" அன்றாடம் நம்மைச்சுற்றி நடக்கின்ற எதார்த்தம் பொதிந்த அழகிய கவிதையாக மிளிர்கிறது இந்தப்படம்.

தயாரிப்பாளரின் இரண்டாவது படம் என்று சொல்ல முடியாத அளவுக்கு
ஒரு அழகியல் தன்மை கதை அமைப்பிலும் அதன் நகர்விலும் படத்தின்
வெற்றிக்கு ஊன்றுகோலாக அமையும் சாதகமான சங்கதிகள் அதிகம்.

எல்லாமே புது முகங்கள் ஆனால் படத்தின் ஒவ்வொரு காட்சியிலும்
மிகத்தேர்ந்த நடிகர்களையும் விஞ்சும் தெளிந்த அப்பட்டமான நடிப்பை
ஒவ்வொரு காட்சியிலும் பாராட்டாமல் இருக்க முடியாது.
வறுமைதான் இந்த நூற்றாண்டின் சாபக்கேடு, வறுமையினால் திறமை
இருந்தும் கற்க முடியாதவர்கள் வாழ்க்கைப் பாரத்தை குறைக்க பட்டணம்
வந்து அடிமாடாக, அடிமைபோல வேலைசெய்வதும் வேலைத்தளத்தில் அவர்கள்
அனுபவிக்கின்ற கொடுமைகளையும் தோலுரித்து காட்டுகிறது "அங்காடித்தெரு".

முதலாளித்துவத்தின் சாக்கடைத்தனமான போக்கு எல்லாக்காலத்திலும்
ஒன்றுதான் என்பதை மீண்டும் ஒருமுறை நிரூபித்து காட்டுகிறது.அடிமட்ட
தொழிலார்களின் நலன்களில் அக்கறை காட்டாக முதலாளி வர்க்கத்தின் முகமூடியை அழகாக கிழித்துக்காட்டும் "அங்காடித்தெரு". ஒவ்வொருவரும்
கட்டாயம் பார்க்க வேண்டிய பேசும் சித்திரமாகும்.

மேற்கத்திய பாலியல் கலாச்சாரத்தை பின்பற்ற துடிக்கும் கமல் போன்றவர்கள்
"பருத்தி வீரன்", "அங்காடித்தெரு" போன்ற நல்ல சினமாக்களை பார்க்க வேண்டும்
இரானிய, சினிமாவின் எதார்த்தத்தை அப்படியே காட்சிப் படுத்திருக்கும் இந்தப் படம்
தமிழ் சினிமாவின் வளர்சிப்பாதையை மெல்ல கட்டமிட்டு காட்டியுள்ளது.

Read more...

மீளெழும் கனவுகள்..

அதிகாலைப் பட்சிகளின்
அலறல் கடந்து..
சூரியகக் குளியல் நடத்தும்
நிர்வாண பொழுது
சுவாசம் புணரப்பட்டு
முகம் கழுவாத மரங்கள்
சோம்பல் முறித்து..
எழும் ஒருநாளின்
தழும்புகளை தடவிப்பார்க்கும்
நிழல்கள்..
தார்ப்பாதைகளின்
தாழ்வாரங்கள் தோறும்..
கனவுக் கொடிகள் படர்ந்து
வேகமாய் ஓடும் வாழ்க்கை
தன்னை கடந்து செல்லும்
ஒரு மிக நெருங்கிய நட்பையோ..
அல்லது..
ஒரு உறவையோ..
அவதானித்து
குசலம் விசாரிக்க முடிவதில்லை
இந்த மீளெழும் கனவுகளில்.

Read more...